TSX-V: nan $0,58 -$0,01 -1,69% Volume: February 16, 2022

Navigation

2011-imi SkyTEM atorlugu misissuinermit elektromagnetiske-mik paasissutissat nalunaarsukkat pisuusaartitsivigineqarneranni siunnerfissat qaffasissumik pingaartinneqartut pingasut paasineqarput

January 31, 2012

Vancouver, Britisk Columbia - (Marketwire – 31. januar 2012) - North American Nickel Inc. (TSX VENTURE: NAN) (OTCBB: WSCRF) (CUSIP: 65704T 108). North American Nickel-ip ("NAN") matumuuna nalunaarutigaa, SkyTEM qulimiguulimmik Time-Domain elektromagnetiskimik (EM) paasissutissat nalunaarsukkat, Ingerlatseqatigiiffiup Kalaallit Nunaata kujataata kitaani Maniitsumi suliassaata ilaanni ukiaq kingulleq katersorneqartut 3D-imik pisuusaartitsivigineqarnera naammassineqartoq, aammalu aasaq manna malitseqartitsinissamut siunnerfissat qaffasissumik pingaartinneqartut pingasut paasineqartut. Taakkua immikkut tamaasa pillugit paasissutissat immikkoortuni tulliuttuni allaaserineqarput.

Immikkoortut pingaarnerit:

  • Target B1-L - norit intrusion-imi nunap qaavata ataani 160 meterini inissisimasutut nalinginnaasuunngitsutut 330 x 100 meterisut manissumiittutut pisuusaartitsivigineqarpoq. Nalinginnaasuunngitsut misileraavigineqanngillat, kisianni siusinnerusukkut nalinginnaasuunngitsut qaavanni nunap qaavani 100-150 meterini qillerinerni nikkel sulfid-it annikitsumik siammarsimasut 12,94 meterini 0,52% tikillugu Ni-taqartut aamma 0,26% tikillugu Cu-taqartut toraarneqarput, tamatumalu intrusion-imi aatsitassannguukkiartuaarnerit ingerlalluarsimasut uppernarsarpaa.
  • Target B1-B – nunap qaavani qanittumi nalinginnaasuunngitsut misileraavigineqanngitsut 700 meterisut takissusillit. Nalinginnaasuunngitsut sammiviat nakissusaallu, sammivimmi tassani annertoorujussuarmik nikerarput. Kajungerisaqassusaanik misissuinermit paasissutissat nalunaarsukkat paasinarsisippaat taanni norit-ip annertoorujussuup (2,5 x 1,0 km) iluaniittoq.
  • Target B1-J – nalinginnaasuunngitsoq 170x16 meterisut takissuseqartoq, nunap qaavanut attuumasoq aammalu Imiak Hill-imut ulloq manna tikillugu Maniitsumi sumiiffimmi pisinnaatitsissuteqarfiusumi nikkelinik aatsitassannguussimasunik nassaarineqartut pingaaruteqarnerpaartaannut, assingulluni. Ilusiliami takutinneqarpoq Imiak Hill-imi aatsitassannguussimasut, oqaluttuarisaanermi qillerinerit amerlanersaat sammiveqatigalugit sanianni inissisimasut, taamaattumillu naammattumik misissuiffigineqarsimanatik. Ilusiliaq killilimmik uingavoq (21 m), tamatumunngalu nunap qaavani annertuunik aatsitassannguussimasunik, aatsitassannguussimasunik itinerusumiittunik ersigunnaarsitsisunik peqarnera pissutaavoq. Tamanna siusinnerusukkut nunap qaavata ataani 130 meterini 9,85 meterinik 2,67%-it tikillugit Ni-taqartunik aamma 0,60%-it tikillugit Cu-taqartunik qillerinerni qupineqartunit taperserneqarpoq.

North American Nickel-imi CEO, Rick Mark oqarpoq: "Maniitsumi suliassaq malugisassaalluarluni siumut ingerlalluarpoq. 2011-imi siunnerfitsinni pingaarnerit tassaasimavoq nikkel bælte-mi tassani pilersaarusiorfiunissamut periarfissagissaarluartumi EM atorlugu misissuinermi teknologiip timmisartumik ingerlanneqartup nutaaliaasup atorluarneqarnissaa. Tassami ukiuni 15-ini qillerinermi siunnerfissanik ujarlernermut Falconbridge-p aamma Cominco-p timmisartoq suluusalik aammalu taamanikkut teknologii atorpaat, taakkualu pissarsiffiusimanngillat. Maniitsumi pisinnaatitsissuteqarfitta 8%-iinnanngua qulaavaallugu timmisartorfigereerlugu uppernarsarparput, EM atorlugu qulimiguulimmik nutaaliaasumik timmisartumik misissuineq, norit-eqarfimmi tassani nikkelinik imaqartumi 75 km-isut takissuseqartumi teknikkinit siusinnerusukkut atorneqartarsimasunit, sunniuteqarluarnerujussuusoq. Ullumi nalunaaruteqarnermi siunnerfiit pingasut siulliit taakkua nikkelinut nunap immikkoortuatut periarfissaqarfiusumi tassani paasisavut, sukumiisumik nassuiarneqarput."

Tunngaviusoq

NAN-ip tusagassiuutitigut nalunaarutaanni ulloq 6. aamma 8. december, 2011-imeersuni nassuiarneqartutut, Maniitsumi suliassap 4.841 km2-isut annertussuseqartup 8%-iata missaani SkyTEM qulimiguulimmik EM atorlugu aamma kajungerisaqarneranik misissuinerni sumiiffiit marluk qulaavaallugit timmisartorfiusuni, nalinginnaasuunngitsut 25-it paasineqarput. Suliassap inissisimaffia aamma sumiiffiit qulaavaallugit timmisartorfigineqartut taakkua ilusiliaq 1-imi aamma 2-imi takutinneqarput.

EM atorlugu pisuusaartitsinermut tusagassiuutitigut nalunaarummi matumani taaneqartumi siunertaavoq, malitseqartitsilluni aatsitassarsiorluni misissuinissamut qillerinissamullu piareersaatitut nalinginnaasuunngitsut 3D-mik misissornissaat. Siunnerfiusut qaffasissumik pingaartinneqartut pingasut tamarmik timmisartorfiusussap 1-ip iluani inissisimapput (ilusiliaq 3).

Target B1-L

Siunnerfiusoq Spotty Hill-ip, noritlegeme-mi ulamertumik ilusilimmi 400 meterit missaannik takissusilimmi aamma 150 meterinik atitussusilimmi sulfid-inik aatsitassannguussimasunik sakkukitsumik (<1 - 2%) siammarsimasunik peqarfiusumut assinguvoq. Taanna 1960-ikkut aallartinneranni Kryolitselskabet Øresund A/S-imit nassaarineqarpoq, taannalu putuliani naatsuaqqani (<60 meterisut takissusillit) tallimani misileraavoq. Putuliani tallimani tamaginni norit nikkel-inik sulfid-inik aatsitassannguussimasunik sakkukitsumik siammarsimasunik peqarfiusoq qupineqarpoq. Qupineqartoq pitsaanerpaaq norit-imi 12,94 meteriusumi 5% missaanni sulfid-taqartumi 0,52%-inik Ni-taqarpoq aamma 0,26%-inik Cu-taqarluni.

SkyTEM atorlugu misissuinermi qulaarneqartup toqqaannartumik ataani EM atorlugu misissuinermi nalinginnaasuunngitsut akunnattumik annertussusillit toraarneqarput. Pisuusaartitsinermi paasinarsisinneqarpoq nalinginnaasuunngitsut manissumi innaallagiaqartumik 330 m missaanni takissuseqartumik aamma 100 m atitussuseqartumik, nunap qaavata ataani 160 meterisut itissusilimmi inissisimasumik pissuteqartut, tamannalu qillerlugu putuliat itinersaasa ataani 100 meterinit annertuneruvoq (ilusiliat 4 aamma 5).

Target B1-B

Siunnerfiusoq taanna pladit innaallagiaqartut arfinillit 9-43 meterinik issussusillit 700 m missaanni ungasissusilimmi takussaasut tulleriissaartutut pisuusaartitsivigineqarpoq. Ilusiliaq 6-imi takuneqarsinnaavoq pladit sammivii uinganerilu, nalinginnaasuunngitsut takissusaasa sammiviat sinerlugu annertuumik nikerartut, tamatumalu paasinarsisippaa tamanna nunap qaleriiaarnerani innaallagiaqanngitsoq pisariitsuinnaq. Oqaatigineqassaaq ilusiliaq 6-imi pladit isorartussusaanni naalineqarsimammata, taakkua sammiviisa ersarinnerusumik takutinnissaat siunertarineqarluni. Pisuni amerlanerni pladit samivitsik sinerlugu qalleraattarput; naak nalinginnaasuunngitsup qiterpasissortaani putuliaq angisooq piviusoorpasikkaluartoq.

Siunnerfiusoq nunap kajungerisaqartup 2,5x1,0 km-eriusup iluani inissisimavoq, taanna norit intrusiv-iusutut nassuiarneqarluni. Pladit pisuusaartitsivigineqartut ilai nunap qaavanut qanittuaqqami inissisimapput, taamaattumik nunap qaavata suliaqarfiginissaanut pilersaarusiorneq, piffissami suliaqarfiusumi matumani ingerlanneqartussaq aqqutigalugu immaqa nalinginnaasuunngitsut aallaaviata aalajangernissaa ajornassanngilaq.

Target B1-J

Siunnerfiusoq taanna Imiak Hill-imut assinguvoq aammalu 172 meterisut takissusilik aamma 16 meterinik issussusilik, nunap qaavanut attuumasoq aammalu taamaallaat 21 meterinik itissusaa isorartussuseqartoq (ilusiliaq 7 aamma 8) takutinneqarluni. Taamaattoq ersarippoq aatsitassannguunnerit putuliaq Im-9-imi takutinneqartutut 21 m ataannut ungasinnerusumut ingerlaqqittut, tassani nunap qaavata ataani ammorluinnaq 130 meterinik itissusilimmi 9,85 meterit manngertunit manngimasunut sulfid-inik aatsitassannguussimasut 2,67%-inik Ni-taqartut aamma 0,60%-inik Cu-taqartut qupineqarlutik. Taamaalilluni takuneqarsinnaavoq nunap qaavani atortut sakkortuumik innaallagiaqartut aatsitassannguussimasunut itinerusumiittunut assiisimasut, tamannalu naatsorsuutigineqarsinnaavoq. Taamaattoq pisuusaartitsinermi paasisat pingaarnerpaat tassaapput, Imiak Hill-imi oqaluttuarisaanermi qillerinerit amerlanersaat, aatsitassannguussimasut saneqqullugit sammiveqatigitillugit sammiveqartinneqarsimasut, taamaattumillu sumiiffik, naatsunik amerlasuunik qillerlugit putuliorfigineqaraluarluni, taakkunanngalu amerlasuuni aatsitassannguussimasut annertuut qupineqarsimagaluartut (takuuk takussutissiaq ilusiliaq 8-imiittoq), eqqortumik misileraavigineqarsimanngitsut. Putuliat marluk imaluunniit pingasut aatsitassannguussimasuni teqeqqorissumik sammiveqartut, tamatumalu kingorna sumiiffimmi tassani periarfissaqarfiusunik pitsaanerusumik nassuiaanissamut 3-komponent EM atorlugu qillerlugu putuliani uuttortaanissaq pisariaqarpoq.

Elektromagnetiskimik Ilusiliamut pisussanut pilersaarut

Nalinginnaasuunngitsut innaallagiaqartut 25-it 2011-imi paasineqartut ilai 19-it Lakewood-imi Colorado-miittumi Condor Consulting-imit Maxwell, tassaasoq programmi Perth-imi Australiamiittumi EMIT-imit EM atorlugu nunap qanoq sananeqaateqarneranik misissuinermit paasissutissanik nalunaarsukkanik misissueqqissaarnissamut inerisarneqarsimasoq, atorlugu pisuusaartitsivigineqarput. Maxwell pisariitsunik, 3D-nik innaallagiaqartunut pladenut ilusilianik, EM atorlugu misissuinermi nalinginnaasuunngitsunik malussarfigineqartunik misissueqqissaarnernit ilisarnaatinik takuneqartunik takutitsisartunik, tunisassiortuuvoq. Pisuusaartitsinerit taamaattut aatsitassarsiorluni misissuinermi sakkussaapput sakkortuut, kisianni periaatsimi killilersuutaanut eqqumaffiginissaat pingaaruteqarpoq, taakkunanilu ilaapput makkua:

  • Ilusiliaq plade-nuinnaq atorneqarsinnaavoq taamaattumillu geometri pisariusut annikitsuaraannarmik pallinneqarsinnaallutik.
  • Pisuni amerlanerni ilusiliamik pisariitsumik asseqanngitsumik, paasissutissanut nalunaarsukkanut paasineqartunut naleqquttumik, suliaqartuusup nalinginnaasuunngitsut pillugit ilimagisaminik paasisaqarfigisinnaasaanik, soqartanngilaq.
  • Paasissutissani nalunaarsukkani ataatsimoortuni timmisartumik katersorneqartuni, matumani nassuiarneqartutut ittuni, nunap qaavanut qanittumi EM atorlugu misissuinermi sakkortuumik qisuariarnerup nalinginnaasuunngitsut sumiiffinnit itinerusumiittunit ”nipaarutsissavai”, taamaattumik nalinginnaasuunngitsut qallersaat appasinnerusuniittunit pitsaanerusumik nassuiarneqarsimasussaalluni.
  • Qualified person
    Nalunaarummi matumani teknikkikkut paasissutissat tamarmik Dr. Mark Fedikow-imit, P. Geo, tassaasoq Qualified person kiisalu North American Nickel Inc.-imi pisortaq misissorneqareerput.

    North American Nickel pillugu
    North American Nikkel tassaavoq aatsitassarsiorluni misissuinermut ingerlatseqatigiiffik Maniitsumi Kalaallit Nunaanniittumi, Sudbury-mi Ontario-miittumi, aamma Thompson-imi, Manitoba-miittumi nikkeleqarfinni 100%-imik kisermaassisussaatitaalluni suliassani pisinnaatitaaffeqartoq. VMS Ventures Inc.-ip (TSX VENTURE: VMS) NAN-ip 45%-iisa missai pigisarai.

    Kalaallit Nunaanni Maniitsumi suliassaq nunap immiikkoortuani nikkeleqarfiuvoq 4.841km2-inik annertussusilimmut aatsitassarsiorluni misissuinissamut pisinnaatitsissuteqarfigineqartoq, tassaniillutik nikkelinik-kanngussannik sulfid-inik aatsitassannguussimasut qaffasissumik akuissuseqartut arlalippassuit norit-inut aamma allanut mafisk-ultramafiske intrusiv-inut akiliussimasut. Qaarsumi peqarfik 70 kilometerinit takinerusoq Kalaallit Nunaata kujammut kimmuinnaq sineriaa ukioq tamaat sikusanngitsoq sinerlugu inissisimavoq.

    Post Creek/Hlaycon-imi suliassaq Quadra FNX Mining-ip Podolsky-mi kanngussannut-nikkelinut-PGE-nut peqarfia sinerlugu periusissatigut inissisimavoq. Sumiiffik peqarfiusoq Whistle Offset Dyke-p ilusaanut, Ni-Cu-PGM-inut ujarassiornikkut nakkutigineqartumut nangissutigalugu inissisimavoq. Nunap sannaata ilusai taamaattut Ni-Cu-PGM-inik annertoorujussuarnik peqarfeqarput aammalu Sudbury-mi sumiiffimmi aatsitassarsiorfiit tunisassiorfiusut tassaniillutik.

    Bell Lake-mi suliassami ilaavoq pisinnaatitsissuteqarfik 256 acres-inik angissuseqartoq, Mystery Offset Dyke-p aamma MOD-itut ilisimaneqartup ilaani kilometeri ataatsip missaa inissisimalluni. MOD, Worthington Offset Dykep nangissutaatut nassuiarneqartarpoq, tassaniillutik Vale-p aatsitassarsiorfia nutaaq Totten aamma peqarfik Victoria pissanganartoq Quadra FNX-imit pigineqartoq.

    Ingerlatseqatigiiffiup aamma Thompson-ip, Manitoba-miittup eqqannguani South Bay-imi Ni-Cu-PGE-nut suliassaq qaffasissumik akuissuseqartoq kiisalu Manitoba-mi Thomson-imi qaarsumi nikkeleqarfiup nunarsuarmi tusaamasaasup ilaani Thompson North-imi aamma Cedar Lake-mi sumiiffiit inerisaaviusussatut suliassat annertoorsuit 100%-imik pigisarai.

    Ingerlatseqatigiiffiup siunissami isumalluarfigisai pillugit nalunaaruteqarnerit, aammalu tusagassiuutitigut nalunaarummi matumani nalunaaruteqarnerit allat tamarmik, oqaluttuarisaanermi pissusiviusut eqqaassanngikkaanni, tassaapput Securities Act-imi 1933-imeersumi paragraf 27A,-imi, Securities Exchange Act-imi 1934-imeersumi paragraf 21E-imi nassuiarneqartutut, aammalu oqariaatsip taassuma Reform Act-imi 1995-imeersumi inuinnaat eqqartuussivimmi suliakkiissuteqartarneranni nassuiarneqarnera malillugu "siunissamut sammisumik nalunaaruteqarnerit ". Ingerlatseqatigiiffiup siunertaraa siunissamut sammisumik oqariartuuteqarnerni taamaattuni Safe-Harbour-imi tunngaviusut, taakkua kingunerisarisaat malinneqassasut. Oqariartuuteqarnerni taakkunani aarlerinaataasut nalorninartortaqartullu ilaammata, taamaalillunilu sukkulluunniit allanngortinneqarsinnaallutik, ingerlatseqatigiiffiup pissusiviusuni angusai, angusassatut naatsorsuutigineqartunit annertuumik allaanerusinnaapput.

    Ilulisilersugartai uani linkimi takusinnaavatit: http://media3.marketwire.com/docs/NAN_figures.pdf

    TSX imaluunniit taassuma sullissisui (TSX-imi aningaasanut niuerfiup malittarisassaanni nassuiarneqartutut), nalunaarutip matuma tulluassusaanut imaluunniit eqqoqqinnaassusaanut akisussaatinneqarsinnaanngillat.

    Attaveqarfissamut paasissutissat:
    North American Nickel Inc.
    Rick Mark
    CEO aamma Siulersuisunut siulittaasoq
    604-986-2020 imaluunniit akeqanngitsumik: 1-866-816-0118
    www.northamericannickel.com

    Freeform Communications Inc.
    Robert Ferguson
    Pisortaq
    778-372-2890

    Najoqqutarisaq: North American Nickel Inc.

604.770.4334 1.866.816.0118
C/o Bennett Jones LLP Attn: Sander Grieve 3400 - One First Canadian Place, P.O. Box 130,
Toronto, Ontario, M5X 1A4