TSX-V: nan $0,58 -$0,01 -1,69% Volume: February 16, 2022

Navigation

North American Nikkel-ip Kalaallit Nunaata kujataata kitaani Ingerlatseqatigiiffiup Maniitsumi Ni-Cu-PGE-nut suliassaani sulfid-inik aatsitassannguussimasut marlunnik assigiinngitsunik suussuseqartut uppernarsivai

October 3, 2012

Vancouver, Britisk Columbia - (Marketwire – 3. oktober 2012) - North American Nickel Inc. (TSX VENTURE: NAN) (OTCBB: WSCRF) (CUSIP: 65704T 108) - North American Nickel-ip ("NAN") matumuuna nalunaarutigaa, Kalaallit Nunaata kujataata kitaani 100%-imik kisermaassisussaatitaalluni Maniitsumi suliassami qillerinernit suliarineqartunit siullernit maannamut paasisaagallartoq paasinarsisikkaat, sumiiffimmi nikkelinik-kanngussannik qaffasissumik akuissuseqartunik, sulfid-inik manngimasunit manngertunut suussusilinnik peqaannarani, kisianni aamma nikkelinik-kanngussanik peqarfinnik siammarsimasunik atituunik ingerlakkuminartunik peqarnissamut periarfissaqartoq.

Oqaluttuarisaanikkut isigalugu Maniitsup eqqaani nikkelinik aatsitassarsiorluni misissuinermi pingaartumik sulfid-it manngertut aatsitassannguussimasut sammineqartarsimapput. NAN-ip 2012-imi qillerinermi putuliaani marlunni (MQ-12-001 aamma 002) ujaqqani noritiskiusuni Kalaallit Nunaanni Norit Bæltep avannarpasinnerusortaani Imiak Hill-imi ilisimaneqartuni sulfid-it aatsitassannguussimasut manngimasunit mannertut qupineqarput. Aatsitassannguussimasut taamaattut periaatsit elektromagnetiskiusut (EM) atorneqarneranni qisuariarluartarput, aammalu qillerlugit putuliani EM (BHEM) atorlugu misissuinerit inernerisa paasinarsisippaat, NAN-ip tusagassiuutitigut nalunaarutaani ulloq 6. september, 2012 ullulerneqartumi nassuiarneqartutut, aatsitassannguunneri itissusaani ammasut.

Sulfid-it aatsitassannguussimasut nikkelit-kanngussat atituumi siammarsimasut annertoorujussuarmik annertussuseqartut, NAN-ip 2012-imi putuliaanni marlunni Imiak Hill-ip kangiani 1,25 km missaanni ungasissusilimmi, qulaarneqartumi Spotty Hill-imik taagorneqartumi, toraarneqarput.

Spotty Hill-imi oqaluttuarisaanermi qillerinerni tallimanik imminnut qannittunik 32,8-59,8 meterisut takissusilinnik putuliortoqarpoq, sumiiffimmi 120 x 40 meterisut annertussusilimmi qillerneqartunik. Putulianni tallimani tamaginni nunap qaavata ataani 2-52 meterinit itissusilimmi nikkelinik-kanngussammik sulfid-it aatsitassannguussimasut qupineqarput. NAN-ip qillerlugu putuliai imminnut 80 meterinik ungasissuseqarput, aammalu itinerusumut qillerneqarlutik. Putuliami MQ-12-05-imi aatsitassannguunnerit siammarsimasut, 118,8 meterisut atitussusilimmi nunap qaavata ataani 130 meterisut itissusilimmut toraarneqarput, aatsitassannguussimasut annertussusaat ilisimaneqartut, annertuumik annertusitinneqarlutik.

NAN-ip ujarassiuunut pisortaa, John Pattison, oqarpoq: "Taamatut atitutigisumi qeqqani nikkelinik-kanngussannik aatsitassannguuttut takugatsigu, nikkelinut nunap immikkoortuani tassani suut periarfissaanersut nutaamik paasisinnaalerparput. Qujanartumik ujarassiuugut marluk; Neil Richardson aamma Mark Fedikow Maniitsumi tammaarsimaarfimmi najuupput, aammalu piffissaq suliaqarfiusussaq naannginnerani sumiiffinni allani aatsitassannguussimasunik taamaattunik peqarfiusunik misileraanissamut aamma periarfissaqarfiusunut sumiiffinnut takusaanissamut piffissaqarsimavugut. Nikkelinik-kanngussannik aatsitassannguussimasunik taamaattunik annertoorujussuarnik peqarnerata aatsitassarsiorfimmik ingerlatsinissamut, aammalu 2013-imi pisussanut pilersaarutitsinni siunnerfissanik suli allanik amerlasoorpassuarnik, annertunerusunik periarfissaqalersippaatigut."

Tusagassiuutitigut nalunaarummi ulloq 20. september, 2012 ullulerneqartumi, NAN-ip nalunaarutigaa, Maniitsumi qillerinermi pisussanut pilersaarummi putuliani 9-ini qillerummit qaqitassanik katillugit 1.550 meterinik qillerinissaq ilaatinneqartoq. (Sumiiffiit qilleriffigineqartut inissisimaffiinut takuuk ilusiliaq 1). qillerummit qaqitanit misissugassat katillugit 531-it Activation Laboratories-imi misissoqqissaarneqartussanngorlugit tiguneqarput. Inerneri suli tamanut ammasumik saqqummiunneqanngillat.

Pisussanut pilersaarut putulianik 10-inik katillugit 2.000 meterit tikillugit takissusilinnik ilaqartussatut pilersaarutigineqaqqaaraluarpoq. Tamatumani agguaqatigiissillugu putuliat 200 meterinik takissuseqarnissaat aallaavigineqarpoq. Kisiannili qillerlugu putuliani arlalinni siunnerfiusutut itissutsimut 150 meterinit annikinnerusumut qupisisoqarpoq, taamaattumik 200 meterinut qillerinissaq pisariaqarani. Aammattaaq sumiiffiup kujasinnerusortaani nalinginnaasuunngitsut marluk qilleriffigineqanngillat, pissutigalugu qillerutip taamatut ungasissusilimmut nuunnissaanut aningaasartuutit, piffissap suliaqarfiusup naalernerani silarlunneranut ataqatigiissillugit, aningaasartuutit akuersaarneqarsinnaanngitsumik annertussuseqalersittussaassammagit. Aalajangiisoqarpoq siunnerfiusut taakkua piffissami qilleriffiusussami tullermut utaqqitinneqassasut.

Siusinnerusukkut tusagassiuutitigut nalunaarutinut tunngatillugu aamma NAN aammalu Maniitsumi suliassaq pillugu paasissutissanik annertunerusunik piniarnermi, suliffeqarfiup nittartagaa alakkarsinnaavat uani www.northamericannickel.com.

Qualified person
Nalunaarummi matumani teknikkikkut paasissutissat tamarmik Dr. Mark Fedikow-imit, P. Geo, tassaasoq Qualified person kiisalu North American Nickel Inc.-imi pisortaq misissorneqareerput.

North American Nickel pillugu
North American Nikkel tassaavoq aatsitassarsiorluni misissuinermut ingerlatseqatigiiffik Maniitsumi Kalaallit Nunaanniittumi, Sudbury-mi Ontario-miittumi, aamma Thompson-imi, Manitoba-miittumi nikkeleqarfinni 100%-imik kisermaassisussaatitaalluni suliassani pisinnaatitaaffeqartoq. VMS Ventures Inc.-ip (TSX VENTURE: VMS) NAN-ip aktiai 21 mio. missai pigisarai.

Kalaallit Nunaanni Maniitsumi suliassaq nunap immiikkoortuani nikkeleqarfiuvoq 4.983km2-inik annertussusilimmut aatsitassarsiorluni misissuinissamut pisinnaatitsissuteqarfigineqartoq, tassaniillutik nikkelinik-kanngussannik sulfid-inik aatsitassannguussimasut qaffasissumik akuissuseqartut arlalippassuit norit-inut aamma allanut mafisk-ultramafiske intrusiv-inut akiliussimasut. Qaarsumi peqarfik 70 kilometerinit takinerusoq Kalaallit Nunaata kujammut kimmuinnaq sineriaa ukioq tamaat sikusanngitsoq sinerlugu inissisimavoq.

Imiak Hill-imi aamma Spotty Hill-imi aningaasarsiutigineqarsinnaasunik aatsitassartaqartunik nassaarnerit siulliit marluk, Maniitsumi Nikkeleqarfiup qaffasissumik naleqarnera periarfissaqarfiuneralu uppernarsarpaat.

Post Creek/Hlaycon-imi suliassaq Quadra FNX Mining-ip Podolsky-mi kanngussannut-nikkelinut-PGE-nut peqarfia sinerlugu periusissatigut inissisimavoq. Sumiiffik peqarfiusoq Whistle Offset Dyke-p ilusaanut, Ni-Cu-PGM-inut ujarassiornikkut nakkutigineqartumut nangissutigalugu inissisimavoq. Nunap sannaata ilusai taamaattut Ni-Cu-PGM-inik annertoorujussuarnik peqarfeqarput aammalu Sudbury-mi sumiiffimmi aatsitassarsiorfiit tunisassiorfiusut tassaniillutik.

WIC Sudbury-p kujammut kangiani 13 km-isut ungasissusilimmi aammalu Wahnapitae-mi Trans Canadiske Hovedvej 17-ip kujataani 1 km-isut ungasissusilimmi inissisimavoq. Sumiiffik 5,6x2,4 km-isut takissuseqarpoq mafisk intrusion-inik qaleriaarneqarluni avannamut kangimuinnaq-kujammut kimmuinnaq sammilluni, nikkelinik-kanngussannik-PGE-nik aatsitassannguussimasunik gabbro-norite aamma gabbro-mik akoqarluni "Injektions Breccia Zone".

Ingerlatseqatigiiffiup siunissami isumalluarfigisai pillugit nalunaaruteqarnerit, aammalu tusagassiuutitigut nalunaarummi matumani nalunaaruteqarnerit allat tamarmik, oqaluttuarisaanermi pissusiviusut eqqaassanngikkaanni, tassaapput Securities Act-imi 1933-imeersumi paragraf 27A,-imi, Securities Exchange Act-imi 1934-imeersumi paragraf 21E-imi nassuiarneqartutut, aammalu oqariaatsip taassuma Reform Act-imi 1995-imeersumi inuinnaat eqqartuussivimmi suliakkiissuteqartarneranni nassuiarneqarnera malillugu "siunissamut sammisumik nalunaaruteqarnerit ". Ingerlatseqatigiiffiup siunertaraa siunissamut sammisumik oqariartuuteqarnerni taamaattuni Safe-Harbour-imi tunngaviusut, taakkua kingunerisarisaat malinneqassasut. Oqariartuuteqarnerni taakkunani aarlerinaataasut nalorninartortaqartullu ilaammata, taamaalillunilu sukkulluunniit allanngortinneqarsinnaallutik, ingerlatseqatigiiffiup pissusiviusuni angusai, angusassatut naatsorsuutigineqartunit annertuumik allaanerusinnaapput.

TSX imaluunniit taassuma sullissisui (TSX-imi aningaasanut niuerfiup malittarisassaanni nassuiarneqartutut), nalunaarutip matuma tulluassusaanut imaluunniit eqqoqqinnaassusaanut akisussaatinneqarsinnaanngillat.

Attaveqarfissamut paasissutissat:
North American Nickel Inc.
Dr. Mark Fedikow, P. Geo.
Pisortaq
604-986-2020 imaluunniit akeqanngitsumik: 1-866-816-0118

604.770.4334 1.866.816.0118
C/o Bennett Jones LLP Attn: Sander Grieve 3400 - One First Canadian Place, P.O. Box 130,
Toronto, Ontario, M5X 1A4